Sendelinge en Sendingorganisasies wat deur ons ondersteun word sal van tyd tot tyd in hierdie kolom onder die soeklig kom sodat almal kan weet wat gedoen word om die Koninkryk uit te brei. Dan kan daar sinvol vir die behoeftes gebid word en ook deur daadwerklike bydraes gehelp word om ons sendelinge by te staan.

Sendingwerk is geen vakansie in die buiteland nie! Dis probleem op probleem wat dikwels sonder die vereiste middele opgelos moet word.

Daar is:
• die kultuurverskille wat skeiding bring
• vals godsdiens wat vooroordeel en geslotenheid vir die Evangelie mee bring
• tekorte aan voedsel en skoon water
• malaria en cholera
• slegte paaie, voertuigkapers
• bedelaars, werkloosheid, armoede en ongeletterdheid
• geen gewaarborgde salaris, mediese bystandsfonds of aftreevoordele nie

Maar desnieteenstaande is daar die wonderlike troos wat van bo kom uit die wete dat jy in die sentrum van God se wil staan. Dat niks jou kan oorkom wat nie deur die Vader beplan is en beheer word nie.

En veral is daar die blydskap en vrede wat alle verstand te bowe gaan wat ervaar word wanneer dit die Here behaag om 'n oes te gee op die moeitevolle saaiwerk.

Wanneer jy kan sien in die oë van jou luisteraar dat die Here iets in hom of haar gedoen het wat jy nie kon regkry nie - die wedergeboorte!

Al was daar ook geen oes dan was dit nog meer as die moeite werd, omdat God verheerlik word, en die Evangelie verkondig is!